Yaponiya ABŞ və İranın danışıqları bərpa etməli olduğunu bildirib

Yaponiya hökuməti Vaşinqtonla Tehran arasında gərginliyin dərhal azaldılmasını və ikitərəfli danışıqların bərpa olunmasını zəruri hesab edir.

​Operativ Media xəbər verir ki, bu barədə ölkənin Nazirlər Kabinetinin baş katibi Minoru Kihara açıqlama verib. O, ABŞ və İran arasında hərbi qarşıdurmanın yenidən alovlanmasından, eləcə də Hörmüz boğazı başda olmaqla regiondakı vəziyyətin pisləşməsindən dərin narahatlıq keçirdiklərini vurğulayıb.

​Kihara qeyd edib ki, mövcud şəraitdə ən vacib vəzifə hərbi gərginliyin səngidilməsi, Hörmüz boğazında sərbəst və təhlükəsiz gəmiçiliyin bərpası, tərəflər arasında dialoqun yenidən qurulması, eləcə də nüvə məsələsi də daxil olmaqla yekun razılaşmanın tezliklə əldə olunmasıdır.

​Xatırladaq ki, sentyabrın 1-də ABŞ Silahlı Qüvvələrinin Mərkəzi Komandanlığı İrandakı hədəflərə silsilə zərbələrin endirildiyini elan edib. Öz növbəsində, İran Yaxın Şərqdəki Amerika bazalarına qarşı cavab zərbələrinin endirildiyini bildirib.