Riçarlison “Tottenhem”lə müqaviləni məhkəmə yolu ilə poza bilər

“Tottenhem”in hücumçusu Riçarlison London klubu ilə qalan müqaviləsinə məhkəmə yolu ilə xitam verilməsi variantını nəzərdən keçirir.

Operativ Media xəbər verir ki, bu barədə “The Athletic” məlumat yayıb.

Braziliyalı futbolçu daha əvvəl “Tottenhem”in 2026/27 mövsümü üçün Premyer Liqa iştirak ərizəsinə daxil edilməyib. Məlumata görə, Riçarlison rəhbərliyə komandadan ayrılmaq istədiyini özü bildirib. Bundan sonra klub onu mövsüm üçün sifariş etməyib.

Bildirilir ki, futbolçuya yeni komanda tapmaq mümkün olmayıb. Hazırda 29 yaşlı hücumçu və onun nümayəndələri müqavilənin qalan müddətinə xitam verilməsi üçün məhkəməyə müraciət imkanını araşdırırlar.

Riçarlison 2022-ci ilin yayından “Tottenhem”də çıxış edir. Onun London klubu ilə müqaviləsi 2027-ci ilin iyununa qədərdir.

Braziliyalı forvard ötən mövsüm bütün turnirlərdə 43 matçda 12 qol vurub və 5 məhsuldar ötürmə edib. “Transfermarkt” portalı futbolçunun bazar dəyərini 25 milyon avro qiymətləndirir.