Çempionlar Liqasında ilk üç turun qol rekordu yenilənib

Operativ Media UEFA-nın rəsmi saytına istinadən xəbər verir ki, oktyabrın 20-21-də keçirilən 18 qarşılaşmada 74 qol qeydə alınıb. Bu, üçüncü turun oyun günləri üçün rekord, bütün turlar arasında isə ikinci ən yüksək nəticədir. Cari mövsümün ikinci turunda 78 qol vurulub.

İlk turda komandalar 69 dəfə fərqləniblər. Beləliklə, üç turun yekununda hər oyuna orta hesabla 4,09 qol düşüb.

Əvvəlki rekord 2025/2026 mövsümündə qeydə alınmışdı. Həmin vaxt ilk üç turda 200 qol vurulmuşdu. Cari mövsümdə bu göstərici 21 qol artıb.

Çempionlar Liqasının tarixində ən məhsuldar tur isə cari mövsümün ikinci turu olub. Həmin mərhələdə 18 oyunun 9-da ən azı beş qol vurulub. “Aston Villa” “Fənərbağça”nı 6:0, “Liverpul” isə LASK-ı 6:3 hesabı ilə məğlub edib.

Digər iki qarşılaşmada 4:3 hesabı qeydə alınıb. “Roma” “Real”a, “İnter” isə “Brügge”yə uduzub.

Üçüncü turda da iki matç yüksək məhsuldarlıqla yadda qalıb. “Liverpul” “Vilyarreal”ı, “Napoli” isə “Bude-Qlimt”i 4:3 hesabı ilə məğlub edib.

UEFA-nın hesablamalarına əsasən, üçüncü turun əvvəlki məhsuldarlıq rekordu 2025/2026 mövsümündə qeydə alınan 71 qol olub. Statistikaya 1992/1993 mövsümündən etibarən qrup mərhələsinin, eləcə də 2024-cü ildən tətbiq edilən əsas mərhələnin nəticələri daxildir.