Azərbaycan və Özbəkistan arasında əbədi dostluq haqqında Müqavilə imzalanıb

Operativ Media xəbər verir ki, sənəd iki ölkə arasında dostluq, qarşılıqlı etimad, strateji tərəfdaşlıq və müttəfiqlik münasibətlərinin daha da möhkəmləndirilməsini nəzərdə tutur.

Müqaviləyə əsasən, tərəflər bir-birinin müstəqilliyini, suverenliyini, ərazi bütövlüyünü və beynəlxalq səviyyədə tanınmış sərhədlərinin toxunulmazlığını qətiyyətlə dəstəkləyəcəklər.

Sənəddə həmçinin qeyd olunub ki, Azərbaycan və Özbəkistan qarşı tərəfin suverenliyinə, təhlükəsizliyinə və ərazi bütövlüyünə zərər vura biləcək blok və ittifaqlarda iştirak etməyəcək, öz ərazilərinin üçüncü ölkələr tərəfindən digər tərəfə qarşı istifadə olunmasına imkan verməyəcəklər.

Müqavilə siyasi, iqtisadi, investisiya, energetika, nəqliyyat və logistika, rəqəmsal inkişaf, kənd təsərrüfatı, təhsil, elm, mədəniyyət, turizm və digər sahələrdə əməkdaşlığın genişləndirilməsini də nəzərdə tutur.