Dünyanın ən böyük silah istehsalçıları – SİYAHI

Ukrayna müharibəsi Atlantik okeanının hər iki tərəfində müdafiə podratçılarına təkan verib.

Bu barədə "Operativ Media" "Sputnik International"a istinadən xəbər verir.

Dünyanın bir çox ölkəsi əla silah istehsal edir, lakin qlobal silah bazarında ən yaxşı beş istehsalçı isə bu ölkələrdir:

1. Amerika Birləşmiş Ştatları

Stokholm Beynəlxalq Sülh Araşdırmaları İnstitutunun (SIPRI) məlumatına görə, ABŞ qlobal silah istehsalçıları və ixracatçıları siyahısına başçılıq edir. Ölkə 2018-2022-ci illər arasında beynəlxalq silah ixracında 40%-lik paya sahibdir. Ümumilikdə ABŞ 103 ölkəni silahla təmin edib ki, bu da planetdəki ölkələrin yarısından çoxdur.

2. Rusiya

Rusiya ümumi qlobal silah ixracatında 16% payla ikinci yerdədir. 2018-2022-ci illərdə Rusiya 47 ölkəyə silah tədarük edib. Hindistan Rusiya silahlarının ən böyük idxalçısı mövqeyini qoruyur. Rusiya döyüş təyyarələri və helikopterləri 1992-ci ildən bəri ölkənin əsas ixrac məhsulları arasındadır.

3. Fransa

2018-2022-ci illərdə Fransa qlobal ümumi silah ixracının 11%-ni təşkil edib ki, bu da 2013-2017-ci illərlə müqayisədə 44% çoxdur. Ümumilikdə, Fransa bu dövrdə 62 ölkəyə silah tədarük edib. Fransa silahlarının əsas alıcıları isə Hindistan, Qətər və Misir olub.

4. Çin

Çin 2018-2022-ci illərdə ümumi qlobal silah ixracında 5,2% pay ilə dördüncü yerdə qərarlaşıb. Hesabat dövründə Çin 46 ölkəyə silah tədarük edib və bu ixracatın 54%-i Pakistana gedib. Eyni zamanda, Pakistan 1991-ci ildən bəri Çin silahlarının əsas alıcısıdır. Üstəlik, Çin son zamanlarda dünyanın ən böyük dron ixracatçısı olub.

5. Almaniya

Almaniya 2018-2022-ci illərdə qlobal ümumi silah tədarükünün 4,2%-ni təşkil edib ki, bu da 2013-2017-ci illərlə müqayisədə 35% azdır. Almaniya silahlarının ən böyük müştəriləri Hollandiya, ABŞ və Böyük Britaniya, həmçinin Qətər, Oman, Misir, Səudiyyə Ərəbistanı və BƏƏ-dir.

 

Gözəl Həşimova