"Unutmayaq ki, ordu ilə bağlı hər bir görüntü düşmən üçün kəşfiyyat məlumatıdır
“Hərbi texnikanı, bölmələrin dislokasiyasını və şəxsi heyətlə bağlı çəkiliş edib paylaşan şəxslərə qarşı ciddi tədbirlər görülməlidir”.
Bunu “Operativ Media”ya açıqlamasında hərbi-siyasi ekspert Ramil Məmmədli bildirib.
Ramil Məmmədlinin sözlərinə görə, ordu ilə bağlı bu cür məlumatların sosial şəbəkələrdə paylaşılması yolverilməzdir.
“Azərbaycan müharibə şəraitində olan ölkədir. Bu baxımdan hər birimiz, eləcə də hərbi xidmətdə olan döyüşçülərimiz bu məsələdə olduqca diqqətli olmalıdırlar. Unutmamalıdırlar ki, hər bir görüntü düşmən üçün kəşfiyyat məlumatıdır. Düşmən həmin məlumatı əldə etmək üçün çox ciddi əmək və zaman sərf etməlidir ki, şəxslər və məntəqələr haqqında məlumat əldə etsin. Bu baxımdan ilk növbədə hərbçilər diqqətli olmalıdır”.
Ekspert bildirir ki, görüntülərin yayılması ilə bağlı hər zaman problemlər yaşanıb.
“2016-cı il aprel döyüşləri, 2020-ci il Vətən Müharibəsi zamanı döyüşləri unutmamalıyıq. Bəzi hərbçilərimizin videogörüntülərinin sosial şəbəkələrdə yayılması ilə düşmən tərəfindən yerləri aşkar olunub , onlar şəhid olublar. Ciddi tədbirlər görülməlidir”.
