Xəzər dənizində 9 Qazaxıstan hərbçisi həlak olub

Qazaxıstanın Manqistau bölgəsində keçirilən hərbi-dəniz təlimləri zamanı Xəzər dənizi sahilində fövqəladə hadisə baş verib.

Operativ Media xəbər verir ki, bu barədə "Kazinform" məlumat yayıb.

Məlumata görə, Qazaxıstan Silahlı Qüvvələrinin Hərbi Dəniz Qüvvələrinin Xəzər dənizi sahilində keçirdiyi təlimlər zamanı hərbçilər döyüş təlimi tapşırığını yerinə yetirərkən hava şəraiti kəskin şəkildə pisləşib.

"Silahlı Qüvvələrinin Hərbi Dəniz Qüvvələrinin Xəzər dənizi sahilində keçirdiyi təlim zamanı hava şəraitinin kəskin pisləşməsi və küləyin güclənməsi səbəbindən hərbçilər dənizə atılıblar. İlkin məlumatlara görə, 19 hərbçi dənizə atılıb. Doqquz hərbçinin öldüyü təsdiqlənib, üçü xilas edilib, biri isə xəstəxanaya yerləşdirilib. Qalan şəxsi heyətin axtarışı davam edir", - Qazaxıstan Respublikası Müdafiə Nazirliyi bildirib.

Axtarış-xilasetmə əməliyyatı davam edir.