ABŞ-nin "İnter Mayami" klubu İtaliyanın "Napoli" komandasında çıxış edən təcrübəli yarımmüdafiəçi Kevin De Brünü heyətinə qatmaq niyyətindədir.

​Operativ Media xəbər verir ki, bu barədə "Mundo Deportivo" nəşri məlumat yayıb. Mənbənin iddiasına əsasən, Mayami təmsilçisi 35 yaşlı belçikalı futbolçunu Lionel Messi, Luis Suares və Rodriqo De Paul kimi ulduzlarla eyni heyətdə birləşdirməyi hədəfləyir.

​Məlumatda bildirilir ki, 2025-ci ilin yayında "İnter Mayami" və "San Diyeqo" De Brün ilə danışıqlar aparsa da, yarımmüdafiəçi karyerasını Avropada davam etdirməyə qərar vermişdi. Hazırda isə futbolçunun Şimali Amerika Liqasına (MLS) keçidi yenidən aktuallaşıb. "İnter Mayami" ilə yanaşı, "Çikaqo Fayr" və "San Diyeqo" klubları da prosesi diqqətlə izləyirlər.

​Qeyd edilib ki, təcrübəli oyunçu 2025/2026 mövsümündə meydana çıxdığı 21 rəsmi matçda 5 qol vurub və 4 məhsuldar ötürmə müəllifi olub.