Yaponiyanın Müdafiə Nazirliyi yeni növ silahların hazırlanmasına başlayacaq

Yaponiya Müdafiə Nazirliyi 2027-ci ildə sualtı bazalı hiposeysmik raketlərin və uzaqmənzilli zərbə dronlarının hazırlanması prosesinə start verməyi planlaşdırır.

​Operativ Media xəbər verir ki, bu barədə "Kyodo" agentliyi məlumat yayıb. Agentliyin əldə etdiyi məlumata əsasən, müvafiq bəndlər 2027-ci il üçün hərbi büdcə layihəsində artıq öz əksini tapıb. Gələcək ilin maliyyə sənədində "cavab zərbəsi potensialı"nın gücləndirilməsinə xüsusi diqqət yetiriləcəyi vurğulanır. Tokio rəhbərliyi ələkeçirilməsi çətin olan sualtı hiposeysmik raketlərin yaradılması ilə yanaşı, pilotsuz sualtı aparatların uzaqmənzilli raket buraxılışı funksiyası ilə təchiz edilməsi texnologiyalarına da yiyələnmək niyyətindədir.

​Həmçinin hava hücumundan müdafiə sahəsində önləyici dronların və gəmi bazalı zərbə PUA-larının satın alınması nəzərdə tutulur. Birləşmiş Əməliyyat Komandanlığı üçün süni intellektə əsaslanan qərarların qəbulunu dəstəkləyən xüsusi sistemin hazırlanması da planlar sırasındadır.

​Xatırladaq ki, daha əvvəl Yaponiya Müdafiə Nazirliyinin 2027-ci maliyyə ili üçün 8,9 trilyon yen (cari məzənnə ilə 56,3 milyard dollar) həcmində rekord büdcə tələb edəcəyi bildirilmişdi. Əlaqədar xərclər də nəzərə alınmaqla, ölkənin hərbi xərclərinin 10,6 trilyon yeni (67,08 milyard dollar) ötəcəyi və ÜDM-in təxminən 1,5 faizini təşkil edəcəyi ehtimal olunur.

​Qeyd edək ki, 2022-ci il dekabrın 16-da Yaponiya hökuməti yeni milli təhlükəsizlik strategiyasını təsdiqləyib. Sənəddə Yaponiyanın potensial rəqibin ərazisindəki hədəflərə qarşı əks-zərbələr endirmək hüququ tanınır, lakin qabaqlayıcı zərbələrin endirilməsinə icazə verilmədiyi qeyd olunur. Strategiyaya əsasən, NATO nümunə götürülərək hərbi xərclərin 2027-ci ilə qədər ÜDM-in 2 faizinə çatdırılması nəzərdə tutulsa da, baş nazir Sanae Takaiti bu hədəfə vaxtından əvvəl nail olunacağını vəd edib. Cavab zərbəsi potensialını əldə etmək üçün hökumət mövcud "Tip-12" raketlərinin mənzilini uzatmağı, öz hiposeysmik silahlarını hazırlamağı və ABŞ istehsalı olan "Tomahawk" qanadlı raketlərini almağı planlaşdırır. Baş nazir vəzifəsinə seçildikdən dərhal sonra Takaiti regiondakı və dünyadakı gərgin təhlükəsizlik vəziyyətini əsas gətirərək, o cümlədən milli təhlükəsizlik strategiyası da daxil olmaqla, əsas sənədlərin yenidən nəzərdən keçirilməsini əmr edib.