Azərbaycanın turizm potensialı qlobal mediada təbliğ olunacaq

Azərbaycanı xaricdə daha yaxşı tanıtmaq və ölkəyə xarici turistlərin axınını artırmaq üçün böyük media kampaniyasına start verilir.

Operativ Media xəbər verir ki, bu 2026–2030-cu illəri əhatə edən Dövlət Proqramında öz əksini tapıb.

Bunu da oxu: Turizmin inkişafına dair 2026–2030-cu illər üçün Dövlət Proqramı təsdiqlənib

Dövlət Proqramına əsasən, Azərbaycanın turizm imici 5 beynəlxalq televiziya kanalında və 2 məşhur onlayn yayım platformasında nümayiş olunacaq. Eyni zamanda film sənayesi və sosial media layihələri vasitəsilə hazırlanan məzmunların illik baxış sayının 100 milyona çatdırılması nəzərdə tutulur.

Kampaniya çərçivəsində beynəlxalq səviyyədə tanınan influenser və blogerlər ölkəmiz haqqında 100-dən çox xüsusi məzmun paylaşacaq. Xarici ölkələrdə sosial media üzərindən aparılacaq rəqəmsal reklamlar sayəsində il ərzində 500 milyondan çox baxış əldə edilməsi planlaşdırılır.

Bununla yanaşı, hər il ən azı 2 hədəf ölkənin insan axını sıx olan mərkəzi küçə və meydanlarında Azərbaycanın turizm brendini əks etdirən açıq hava reklamları yerləşdiriləcək.