“Mançester Yunayted” Murillonu transfer etmək istəyir

“Mançester Yunayted” “Nottingem Forest”in müdafiəçisi Murillonu transfer etməkdə maraqlıdır və 2027-ci ilin yayında braziliyalı futbolçu üçün rəsmi təklif göndərə bilər.

Operativ Media xəbər verir ki, bu barədə “Football Insider” nəşri məlumat yayıb.

Mənbənin məlumatına görə, “Nottingem Forest” 24 yaşlı futbolçu üçün yüksək məbləğdə təklif alacağı təqdirdə onun satışına razılıq verə bilər. Xüsusilə komanda 2026/2027 mövsümünü İngiltərə Premyer Liqasının turnir cədvəlinin aşağı pillələrində başa vurarsa, klubun mövqeyini dəyişməsi mümkündür.

Murillonun “Nottingem Forest”lə müqaviləsi 2030-cu ilə qədər qüvvədədir. Müdafiəçi komandanın əsas oyunçularından biri olsa da, cari mövsümdə çıxışı qeyri-sabit qiymətləndirilir. O, 11 matçda bir məhsuldar ötürmə ilə yadda qalıb.

“Mançester Yunayted” uzun müddətdir braziliyalı futbolçunu izləyir və onu mərkəz müdafiə xəttinin gücləndirilməsi üçün potensial namizəd hesab edir.

“Nottingem Forest” daha əvvəl Murillonu satmaqdan imtina edib, “Çelsi”nin təkliflərini də qəbul etməyib. Bildirilir ki, klub futbolçunun transfer qiymətini 84-96 milyon avro arasında müəyyənləşdirib. Bu səbəbdən onun qış transfer pəncərəsində komandadan ayrılması az ehtimallı, yayda isə mümkün hesab olunur.

Qeyd edək ki, “Transfermarkt” portalı Murillonun bazar dəyərini 50 milyon avro olaraq qiymətləndirir.