Son dövrlər sosial şəbəkələrin aktivliyi ənənəvi reklam kanallarının təsirinin müzakirəsinə səbəb olub. Bütün dünyada eləcə də ölkəmizdə sosial şəbəkələrin, yoxsa televiziya və radio reklamlarının daha effektiv olması müzakirə olunur. Həqiqətən, rəqəmlə ölçüləbilən, geridönüşü sürətli olan sosial şəbəkə reklamları daha sərfəlidir, ya ənənəvi hesab etdiyimiz və cəmiyyətin bütün təbəqələri üçün daha əlçatan hesab olunan televiziya və radio reklamları?
"Admedia" reklam agentliyinin rəhbəri Sabit Məmmədov "Operativ Media"ya açıqlamasında bildirib ki, reklamın növü istehsal edilən məhsuldan asılı olaraq dəyişir.
Onun sözlərinə görə, televiziya, radio, sosial, media və ya çöl reklamlarının hər birinin özünəməxsus auditoriyası var:
“Praktikada görürük ki, avtomobil satışı üçün hazırda effektiv reklam kanalı radio sayılır və yaxud mənzil satışı ilə bağlı da bunu demək olar. Əvvəllər sahibkarlar reklama inanmırdılar və yaxud fərqli baxırdılar. Hazırda reklamlar o qədər effektiv olub ki, reklamsız biznesin getmədiyini demək olar. Biznesi bir avtomobil kimi görsək, reklam onu hərəkətə gətirən qaz pedalıdır. Reklamla bağlı sosial media, digər kommunikasiya vasitələri və yaxud reklam daşıyıcıları yaranarsa da, bu yenə də hazırda televiziya və radionun büdcəsinə çox təsir göstərmir, lakin azalmalar olur. Əsasən, hazırda televiziya ilə radio effektiv reklam daşıyıcısı sayılır. Sadəcə olaraq bir problem var ki, rəqəmsal media reklamları ölçüləbilən reklam vasitəsidir".
Ekspert qeyd edib ki, sosial mediada ay sonunda hesabat edərkən reklamı görən və klikləyən insanların sayını müəyyənləşdirmək mümkün olur, lakin bu tam dəqiq ölçü televiziya üçün keçərli deyil, radioda isə ümumiyyətlə mümkün deyil.
Sabit Məmmədovun sözlərinə görə, hələ də ən effektiv reklam vasitəsi televiziya hesab olunur:
“Ümumi effektivlik baxımından ardıcıllıqda ən yaxşı televiziyanın effektivliyidir, sonra sosial media, daha sonra isə radio reklamların məhsuldarlığı çox yaxşıdır. Eyni zamanda çöl reklamları da çox təsiredicidir".
Sevinc İbrahimzadə
