Təhsil eksperti Rizvan Fikrətoğlu bildirir ki, qonşu ölkələrdə təhsil haqları 1500 manatdan başladığı halda, Azərbaycandakı dövlət universitetlərində bu rəqəm ən azı 2200 manatdır və 5000 manata qədər yüksəlir. Əlavə təhsildə isə qiymətlər 10 000 manata çatır. Ekspertin sözlərinə görə, hazırda dövlət universitetlərinin qiymətləri özəl müəssisələri üstələyib və bəzi universitetlər hər il qiymətləri 100-500 manat civarında artırır.

Kolleclərdə isə illik ödənişlər regionlarda 600-800 manat, Bakıda isə 950-1100 manat arasında dəyişir. Hətta ötən il bəzi özəl kolleclərdə təhsil haqqı 2300 manata, peşə məktəblərində isə 4500-5000 manata qədər yüksəlib.

Rizvan Fikrətoğlu qeyd edir ki, təhsil haqları universitetin saxlanma xərcləri, kommunal ödənişlər, müəllimlərin maaşları və tələbələrə yaradılan əlavə imkanlara görə müəyyən edilməlidir. Lakin universitetlər bu gəlir və xərclər barədə ictimaiyyətə hesabat vermirlər. Süni qiymət artımının qarşısını almaq üçün bu sahədə ciddi şəffaflıq və nəzarət lazımdır.