Tovuz Rayon Polis Şöbəsinin əməkdaşlarının qanunsuz ovun qarşısının alınması məqsədilə keçirdikləri növbəti tədbirlər nəticəsində rayonun Əsrik-Cırdaxan kəndi ərazisində ov üçün təyin edilməyən yerdə qanunsuz ov edən kənd sakini saxlanılıb. Həmin şəxsdən qanunsuz ovladığı 2 ədəd çöl dovşanı və 1 ədəd ov tüfəngi aşkarlanıb.Faktla bağlı həmin şəxs barəsində İnzibati Xətalar Məcəlləsinin 272.3-cü (Ov qaydalarının kobud şəkildə pozulması) maddəsi ilə inzibati protokol tərtib olunub.

DİN-in Mətbuat Xidmətinin Gəncə regional qrupundan "Operativ Media" verilən məlumata görə, bundan başqa, şöbə əməkdaşları qanunsuz saxlanılan silah-sursatın aşkarlanaraq götürülməsi, qanunsuz ov və gələcəkdə baş verə biləcək cinayətlərin qarşısının alınması istiqamətində əməliyyat-axtarış və profilaktiki tədbirləri davam etdirir. Keçirilən müvafiq tədbirləri nəticəsində 8 nəfər rayon sakinindən müvafiq sənədləri olmayan ov tüfəngləri aşkarlanaraq götürülüb.

Faktlar üzrə araşdırmalar aparılır.