Ukraynanın şərqindəki "Ukrnafta" ASC-nin yeddi istehsal aktivi avqustun 7-si gecəsi Rusiyanın genişmiqyaslı hücumuna məruz qalıb.

Operativ Media bu barədə xarici KİV-ə istinadən xəbər verir.

Şirkətin məlumatına görə, hücum nəticəsində kritik əhəmiyyətli avadanlıq məhv edilib, bu da bir sıra istehsalat obyektlərinin dayanmasına və hasilat həcmlərinin əhəmiyyətli dərəcədə itirilməsinə səbəb olub.

"Naftoqaz"ın İdarə Heyəti sədrinin əvəzedicisi Sergey Fedorenko qeyd edib ki, bu, son vaxtlar "Ukrnafta" obyektlərinə edilən ən böyük hücumlardan olub.

"Xoşbəxtlikdən, xəsarət alan yoxdur", - o vurğulayıb.

Bundan əlavə, ötən sutka ərzində Rusiya qoşunları Zaporojye və Dnepropetrovsk vilayətlərində "Ukrnafta"nın dörd yanacaqdoldurma kompleksinə hücum edib. Şirkətin məlumatına görə, əməkdaşlar və ziyarətçilər yaralanmayıblar.

"Naftoqaz" xatırladıb ki, bu ilin əvvəlindən bəri Rusiya zərbələri nəticəsində artıq "Ukrnafta"nın 32 yanacaqdoldurma kompleksi və "Ukrqazvıdobuvannya" SC-nin beş istehsalat obyekti dağıdılıb.