İran və Oman Hörmüz boğazında gəmilərin hərəkəti üçün yeni marşrutun müəyyənləşdirilməsi ilə bağlı razılaşmaya yaxındırlar.

Operativ Media xəbər verir ki, bunu İranın xarici işlər naziri Abbas Əraqçi avqustun 8-də keçirdiyi mətbuat konfransında deyib.

Onun sözlərinə görə, tərəflər Hörmüz boğazının idarə edilməsinin hüquqi mexanizmi və gəmilərin hərəkət marşrutunun müəyyənləşdirilməsi ilə bağlı danışıqları davam etdirirlər. Əraqçi bildirib ki, razılaşma əldə olunmasına az qalıb, lakin boğazın tam açılması digər şərtlərdən, o cümlədən ABŞ-nin İslamabad memorandumunu pozması ilə bağlı məsələlərin həllindən asılıdır.

Nazir qeyd edib ki, əvvəl qüvvədə olan gəmi hərəkətinin ayrılması sistemi artıq İranı qane etmir. Bu səbəbdən texniki və hüquqi çətinlikləri nəzərə alan yeni marşrutun hazırlanmasına ehtiyac var.

Əraqçinin sözlərinə görə, hazırda daimi marşrut razılaşdırılanadək müvəqqəti hərəkət sxeminin tətbiqi müzakirə olunur. İran və Oman tərəflərinin hərbi və hərbi-dəniz nümayəndələri mövcud xəritələr əsasında danışıqlar aparıblar və müzakirələr başa çatdıqdan sonra yeni marşrut müəyyən ediləcək.

Əraqçi həmçinin ABŞ-ni İslamabad memorandumunun şərtlərini pozmaqda ittiham edib. O bildirib ki, İran memorandum üzrə öhdəliklərini yerinə yetirib və gəmiçiliyin bir ay ərzində əvvəlki səviyyəyə qayıtması nəzərdə tutulsa da, ABŞ-nin son addımları vəziyyətə təsir göstərib.