Son günlər sosial şəbəkələrdə dəyəri 20 min manatdan artıq olan ev, mənzil, bağ sahəsi ödənişini notariuslarda edərkən deklarasiya (pulun mənbəyi haqqında məlumat) tələb edilməsi ilə bağlı məlumatlar yayılıb.

“Operativ Media” bir neçə notariat ofisi ilə məsələni dəqiqləşdirib. Notariat ofisləri xəbəri təsdiqləyiblər. Onlar bildirdilər ki, sistemdə belə bir tələb mövcuddur. Hələ ki, sənəd tələb edilmir. Lakin gəlirin haradan əldə edilməsi ilə bağlı qeydiyyat götürülür.

Əmlak məsələləri üzrə ekspert Nofəl Quliyev isə bildirir ki, bu qərar daşınmaz əmlak bazarına ciddi təsir edəcək:

“Alıcılar çaş-baş qalıb. Notariuslar belə tələb irəli sürməsi əslində qanuni deyil. Çünki bu qərar təsdiqlənməyib. Bizdə əmlak bazarı Rusiyada yaşayan Azərbaycanlıların hesabına daha çox canlanır. Hər il fevral ayından maya qədər pul axını olur. Elə evlər də bu müddətə satılır. Rəsmi işləməyən nə qədər insan var, deklarasiya tələbi onları başqa bizneslərə yönləndirəcək. Sənədlə gəlirin mənbəyi tələb olunsa, insanlar bundan əziyyət çəkəcək”.