Uşaq yeməklərinin ucuzlaşması üçün yaxın vaxtlarda vergilərdə güzəştlər ola bilər - İqtisadçı

Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında Vergi Məcəlləsinə təklif olunan dəyişikliklərin müzakirəsi zamanı deputat Əli Məsimli uşaq yeməkləri və ləvazimatlarının qiymətinin günü-gündən qalıxdığını bildirib.

Bir neçə mağazaya yaxınlaşsaq görərik ki, uşaq qidalarının qiymətləri olduqca bahadır. Bəzi uşaq yeməklərinin qiymətləri 30-70 AZN və ya daha bahadır. Orta hesabla deyə bilərik ki, uşaq məhsulları, xüsusi ilə qidaların qiymətləri gənc ailələr üçün olduqca yüksəkdir. Valideynlər övladının bir həftəlik üçün (qidası, pampers,dərman və s)  həftəlik 70-140 manat pul xərcləyir. Bu məhsulun qiymətinə görə 250 manata kimi qalxa bilir.

İqtisadçı Emin Qəribli “Operativ Media” açıqlamasında bildirib ki, uşaq yeməklərinin və bəzi digər məhsulların baha olması hazırda çox aktual mövzudur:

“Uşaq yeməkləri və bəzi digər məhsullar var ki, onlara müəyyən güzəştlər edilməlidir. Bu güzəştlər müxtəlif formalarda ola bilər. İlk olaraq, uşaq məhsullarından və digər bahalı qidalardan ƏDV-nin diferensiasiya edilməsi vacibdir. Yəni uşaq yeməkləri, dərmanlar kimi zəruri məhsullara daha aşağı ƏDV dərəcəsi tətbiq edilə bilər. Ölkəyə idxal olunan uşaq yeməkləri, geyimləri, kitabları və digər məhsullara xüsusi güzəştlər tətbiq olunmalıdır. Əlbəttə, bu sahədə müəyyən güzəştlər mövcud ola bilər, amma onlar genişləndirilməlidir.

Bu cür məhsullar bütün dünyada geniş yayılıb və bir çox ölkələrdə bu məhsullara vergi güzəştləri tətbiq olunur. Bu məhsullara xüsusi vergi güzəştləri təqdim olunmalıdır. Eyni zamanla bu siyahı artırılmalıdır. Uşaq yeməklərinin qiymətlərinin ucuzlaşması üçün yaxın zamanda vergilərdə xüsusi güzəştlər həyata keçirilə bilər”.