“Bolonya” Domeniko Tedesko ilə yollarını ayırıb
“Bolonya” baş məşqçi Domeniko Tedesko ilə yollarını ayırıb və onun yerinə Raffaele Palladino təyin olunub.
Operativ Media xəbər verir ki, yeni baş məşqçi ilə 30 iyun 2029-cu ilədək müqavilə imzalanıb. 42 yaşlı mütəxəssis bu gün, sentyabrın 16-da komanda ilə ilk məşqinə çıxacaq.
Tedesko 10 iyun 2026-cı ildə “Bolonya”nın baş məşqçisi təyin edilmişdi. Komanda onun rəhbərliyi altında İtaliya çempionatının ilk 4 turunda qələbə qazana bilməyib. Bu görüşlərdə 1 heç-heçə və 3 məğlubiyyət qeydə alınıb. “Bolonya” hazırda turnir cədvəlinin 16-cı pilləsində qərarlaşıb.
Sentyabrın 8-də Tedesko 3-cü turda “Sassuolo” ilə 2:2 hesablı heç-heçə etdikləri matçda hakimə qarşı hörmətsiz davranışına görə 2 oyunluq diskvalifikasiya edilib.
Domeniko Tedesko 2019-2021-ci illərdə “Spartak”a rəhbərlik edib. O, həmçinin “Şalke”, “Leypsiq”, “Fənərbaxça” və Belçika millisini çalışdırıb.
