Şimali Koreya nüvə silahından imtina etməyəcəyini açıqlayıb

Şimali Koreya ABŞ və müttəfiqlərinin mövqeyindən asılı olmayaraq nüvə silahına malik olmaq siyasətini davam etdirəcəyini bəyan edib.

Operativ Media xəbər verir ki, bunu ölkənin xarici işlər naziri Çoy Son Hi ABŞ, Yaponiya və Cənubi Koreyanın xarici işlər nazirlərinin üçtərəfli görüşünün nəticələrini şərh edərkən bildirib.

Nazirin sözlərinə görə, Pxenyanın nüvə silahına sahib olmaq iradəsi dəyişməz olaraq qalacaq və ölkə bu mövqedən geri çəkilməyəcək.

Çoy Son Hi qeyd edib ki, Vaşinqton, Tokio və Seul Şimali Koreyanın BMT Təhlükəsizlik Şurasının qətnamələrinə uyğun olaraq nüvəsizləşdirilməsinə sadiq olduqlarını bir daha təsdiqləyiblər. O, bunun üç ölkənin Pxenyana münasibətdə əvvəlki yanaşmasını qoruduğunu göstərdiyini bildirib.

XİN rəhbəri vurğulayıb ki, Şimali Koreyada nüvə silahı dövlət suverenliyinin toxunulmazlığının əsas elementi və onun qorunmasının ən yüksək təminatı hesab olunur.

Çoy Son Hi əlavə edib ki, nüvəsizləşdirmə tələbləri Şimali Koreyanın ABŞ-a münasibətdə mövqeyini daha da möhkəmləndirəcək.

Nazir həmçinin bildirib ki, digər ölkələrin mövqeyindən asılı olmayaraq Şimali Koreyanın nüvə dövlət statusu dəyişməz qalacaq. Onun sözlərinə görə, mərkəzində nüvə silahına malik Şimali Koreyanın dayandığı geosiyasi arxitekturanın yenidən formalaşması və möhkəmlənməsi qaçılmaz olacaq.