Əli Hüseynov: İnvestorların daşınmaz əmlakla bağlı gözləntiləri dəyişib

“Binaların enerji və su səmərəliliyi məsələsində standartlara riayət olunması olduqca vacibdir. BMT-nin Ətraf Mühit Proqramının son hesabatına görə, qlobal CO2 emissiyalarının 77 faizi bizim sektorumuzun payına düşür. Qarşıdakı 10 il ərzində verəcəyimiz qərarlar növbəti 50 il ərzində dünyada istehlakın gələcəyini formalaşdıracaq. Çünki qlobal statistikaya görə, 2050-ci ilədək tamamlanacaq binaların və inkişaf layihələrinin hətta 50 faizi hələ inşa edilməyib”.

Operativ Media xəbər verir ki, bunu Avant Group-un Direktorlar Şurasının sədri Əli Hüseynov Azərbaycan Beynəlxalq İnvestisiya Forumunda çıxışı zamanı deyib.

Əli Hüseynov bildirib ki, hazırda həyata keçirilən layihələrdə LEED və EDGE kimi yaşıl sertifikatlaşdırma sistemlərinin tətbiqi müştərilər və investorlar üçün dayanıqlılığı təmin edir.

“İnvestorların gözləntiləri də dəyişib. On il əvvəl investorlar bir kvadratmetrin hazırkı qiymətinin nə qədər olduğunu və üç və ya beş ildən sonra nə qədər olacağını qiymətləndirirdilər. İndi isə onlar yenidən satış sürətini, layihənin təhvilindən sonra kimin kirayəçi olacağını, əmlakı kimin idarə edəcəyini, çıxış ssenarisini, vergitutmanı, vergi güzəştlərini, ölkə üzrə sabit riskləri və bütün bunları qiymətləndirirlər”.

O qeyd edib ki, investorlar layihəyə başlamazdan əvvəl əmlak üzrə bir növ texniki-iqtisadi əsaslandırma aparırlar.

“Son məlumatlara görə, bizim portfelimizdə yeni alıcıların 20-30 faizi əvvəlki rezidentlərimiz və ya investorlarımızdır. Bu nəticəyə gəlirik ki, binaların və layihələrimizin dayanıqlılığı və etibarlılığı bizi getdikcə daha da böyüdür”.