Müdafiə Nazirliyinin rəhbərliyi Şəhidlər xiyabanlarını və Zəfər parkını ziyarət edib

27 Sentyabr – Anım Günü münasibətilə Müdafiə Nazirliyinin rəhbərliyi və digər hərbi qulluqçuları Hərbi Memorial Məzarlığı və Şəhidlər xiyabanını ziyarət edib. 

Operativ Media xəbər verir ki, bu barədə MN məlumat yayıb.

Ölkəmizin müstəqilliyi, ərazi bütövlüyü və suverenliyi uğrunda canını fəda etmiş Vətən övladlarının məzarları önünə gül dəstələri düzülüb, şəhidlərimizin xatirəsi yad edilib.

General-polkovnik Zakir Həsənov 44 günlük Vətən müharibəsini simvolizə edən abidənin və “Əbədi məşəl” abidə kompleksinin önünə gül çələngləri qoyub, şəhidlərimizin xatirəsinə ehtiram göstərib.

Sonra nazirliyin rəhbər heyəti və digər hərbi qulluqçular Zəfər parkını ziyarət edib. Burada şəhidlərə ehtiram əlaməti olaraq Zəfər abidəsinin önünə əklil və gül dəstələri qoyulub.

Tədbirlər çərçivəsində müdafiə naziri general-polkovnik Z.Həsənov və digər rəhbər şəxslər şəhid ailələri ilə görüşərək onların qayğıları ilə maraqlanıblar. Görüşlərdə şəhid ailələri və yaxınları onlara göstərilən diqqət və qayğıya, eləcə də şəhidlərimizin xatirəsinin daim uca tutulduğuna görə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev və Birinci vitse-prezident Mehriban xanım Əliyevaya, həmçinin Müdafiə Nazirliyinin rəhbərliyinə minnətdarlıqlarını bildiriblər.