Bakının Baş Planının təsdiq edilməsi ilə sənədsiz evlərin taleyi həll ediləcəkmi?

Bakının illərdir dəyişməyən problemlərindən biri sənədsiz evlərlə bağlıdır. 

Əmlak məsələləri üzrə ekspert Elnur Fərzəliyev "Operativ Media"ya bildirib ki, bu problemin Baş Planla o qədər də əlaqəsi yoxdur. 

“Sənədsiz evlər problemi illərdir ki, var və həll edilmir. Bunun həlli üçün amnistiya lazımdır. Necə ki, Gürcüstanda bu problem amnistiya ilə həll edildi. Çünki bizdə əsas problem torpağın təyinatı ilə bağlıdır. Bu gün Bakı ətrafında tikilən evlərin çoxu kənd təsərrüfatı təyinatlı torpaqların üzərində inşa edilib. Vaxtilə Bakıda əkinçilik, maldarlıqla məşğul olublar. Faktiki olaraq indi buna şərait də yoxdur. Ona görə də düşünürəm ki, bu məsələyə yenidən baxılmalıdır. Elə ərazilər var ki, SSR-nin dönəmindən yaşayış olub, amma sənədinə baxırsan təyinat kənd təsərrüfatıdır. Yasamal ərazisində həmişə yaşayış olub. Amma bu problem orada da var”.

Elnur Fərzəliyev bələdiyyə sənədi ilə alınan torpaqlarda inşa edilən evlərlə bağlı məsələyə də aydınlıq gətirib.

“2007-ci ilə qədər bələdiyyələrin səlahiyyəti var idi ki, torpaq satsınlar. Bu səlahiyyət bələdiyyəyə ona görə verildi ki, satıb büdcə formalaşdırsın. Lakin müvafiq xəritələr bələdiyyələrə verilmədi. Nəticədə məlum oldu ki, vətəndaşın aldığı torpaq sahələri digər qurumların olub. İndi isə həmin torpaqlarda inşa edilən evləri sənədləşdirmək olmur. Bundan da ən çox dövlət və iqtisadiyyat ziyan çəkir. Düşünürəm ki, bu məsələlərin hamısına kompleks şəklində yenidən baxmaq lazımdır”.