Uzun illərdir müzakirə olunan Bakı şəhərinin Baş Planı nəhayət ki, təsdiq edildi. Baş Planın icrası paytaxtda köklü dəyişikliklərə səbəb olacaq. Rieltorlar bəzi ərazilərdə torpaq və ev qiymətinin artacağını deyirlər.

“Operativ Media”ya açıqlama verən Nofəl Babayev deyir ki, yeni Baş Planda bir çox ərazilərə metrostansiyaların inşası və dəmiryol xəttinin uzadılması təklif olunur. O bildirir ki, nəqliyyat infrastrukturunun əlçatanlığı hər zaman alıcılığı artırıb.

“Baş Planda stansiyaların sayı 2040-cı ildə 46-ya çatdırılacaq. Hətta, 2027-ci ildə 31 stansiya olmalıdır. Bu isə o deməkdir ki, 3 ildə 4 stansiya tikiləcək. Xocasən stansiyasının istifadəyə verilməsi ilə ona yaxın evlərin qiyməti azı 30% artdı. Bu, qiymətə birbaşa təsir edir. İlk növbədə metrostansiyalara piyada məsafədə olan evlərin qiyməti artacaq. Daha sonra isə müvafiq olaraq ilk 5 km radiusda evlərin qiyməti bahalaşacaq”.

Nofəl Babayevin sözlərinə görə, bahalaşma ilkin olaraq Zığ, Yeni Günəşli və Yeni Yasamalda müşahidə ediləcək.

“Görünən odur ki, metrostansiyalardan ən tez istifadəyə veriləni Yeni Günəşli stansiyası olacaq. Zığın böyüməsi və yaşayış üçün şəraitin yaxşılaşdırılması üçün işlər görüləcək. Xırdalan metro xəttinin çəkilməsi planda var. Bunanla yanaşı Bakı dairəvi metrostansiyasının tamamlanması o deməkdir ki, bu dairə boyunca yerləşən bütün stansiyaların ətrafında qiymət artımı gözlənilir. Nəzərə alsaq ki, stansiyaların istifadəyə verilməsi bir xeyli müddət çəkəcək. Ona görə də əsas bahalaşma ilk istifadəyə verilən stansiyaların ətrafında olacaq. Ümumilikdə söhbət 15-20% artımdan gedir”.