DSK sədri: “Yeni yaşayış massivlərində səsvermə üçün zəruri şərait yaradılıb”

Son illərdə əhalinin mənzil şəraitinin yaxşılaşdırılması məqsədilə çoxlu sayda yeni yaşayış massivləri tikilərək istifadəyə verilib. Bu sırada Mənzil İnşaatı Dövlət Agentliyi (MİDA) tərəfindən Bakının Yasamal və Suraxanı rayonlarında, həmçinin Gəncə və Sumqayıt şəhərlərində salınmış qəsəbələr də var.  

"Operativ Media" Secki-2024.az-a istinadən xəbər verir ki, yeni yaşayış massivlərində 7 fevral prezident seçkiləri üzrə səsvermə gününə hazırlıq vəziyyətini araşdırıb. 30 saylı Suraxanı birinci dairə seçki komissiyasının (DSK) sədri Vilayət Əmirov saytımıza açıqlamasında bildirib ki, dairə üzrə bütün ərazilər kimi, yeni yaşayış massivlərində də səsvermənin qaydalara uyğun formada keçirilməsi üçün tam şərait yaradılıb:

“Yeni yaşayış massivlərində məskunlaşma ilə əlaqədar olaraq Suraxanı rayonunun Hövsan qəsəbəsində üç yeni seçki məntəqəsi fəaliyyətə başlayıb. MİDA-nın Hövsandakı yaşayış komplekslərində yeni yaradılmış 26, 27 və 28 saylı məntəqələrdə də seçkilərin Azərbaycan Respublikasının qanunvericiliyinə uyğun formada azad, şəffaf və demokratik keçirilməsi üçün bütün lazımi şərait yaradılıb. 26 saylı məntəqədə 1 335 nəfər, 27 saylı məntəqədə 1 383 nəfər, 28 saylı məntəqədə isə 887 nəfər seçici qeydiyyatdadır. Hər üç məntəqə müasir tələblərə uyğun formada tikilmiş binalarda yerləşir. Burada təminat və təchizat məsələləri həll edilib, hazırlıq işləri tam yekunlaşıb”.

Vilayət Əmirov vurğulayıb ki, dairədə fəaliyyət göstərən 40 seçki məntəqəsində ümumilikdə qeydiyyatda olan 52 237 nəfər seçicidən 789 nəfərin yaşı 80 ilə 100 arasındadır: “2 866 nəfər seçici isə prezident seçkilərində ilk dəfə səsvermə hüququndan istifadə edəcək. Onlardan 21 nəfərin 18 yaşı fevral ayında, 4 nəfərin isə məhz seçki günü tamam olur”.