Polis parlament seçkiləri günü gücləndirilmiş iş rejimində fəaliyyət göstərəcək

Polis əməkdaşları sentyabrın 1-də keçiriləcək parlament seçkiləri günü gücləndirilmiş iş rejimində fəaliyyət göstərəcək. Polisin fəaliyyəti ilə bağlı qaldırılan bütün məsələlər dərhal öz həllini tapacaq.

"Operativ Media" xəbər verir ki, bu sözləri daxili işlər nazirinin müavini Oqtay Kərimov Mərkəzi Seçki Komissiyasında dairə seçki komissiyalarının sədrləri üçün keçirilən müşavirədə deyib.

Nazir müavini bildirib ki, seçkiqabağı təşviqat materiallarının yayılmasına mane olan halların qarşısı alınacaq. Onun sözlərinə görə, polis orqanlarına daxil olmuş müraciətlərə təxirə salınmadan baxılaraq cavab veriləcək.

“Həmçinin seçki prosesi bitəndən sonra bülletenlər və seçki protokolları polisin müşayiəti ilə aparılacaq. Qanunsuz aksiyaların, ictimai asayişin pozulması hallarının qarşısının alınması üçün bütün tədbirlər görüləcək”, - deyə nazir müavini diqqətə çatdırıb.