"İstehlak səbətindəki məbləğ nə qədər yüksək olarsa, insanların rifahı da bir o qədər yaxşı olar" - Sosioloq

O bildirib ki, minimum istehlak səbətinin tərkibinə baxılması üçün müvafiq işçi qrup fəaliyyət göstərir və bu, İqtisadiyyat Nazirliyinin daim diqqət mərkəzində saxladığı məsələdir. Hüseyn Hüseynov qeyd edib ki, 2025-ci ildə istehlak səbətinin tərkibinə yenidən baxılacaq.

Bəs minimum istehlak səbətinin məbləği nə qədər olmalıdır?

Məsələ ilə bağlı sosioloq Mətanət Məmmədova "Operativ Media"ya açıqlama verib. O bildirib ki, hazırda minimum istehlak səbətinin məbləği çox aşağıdır:

"İstehlak səbəti vətəndaşların ərzaq və qeyri-ərzaq məhsullarına olan tələbatının minimum şəkildə ödənilməsi deməkdir. Ölkə əhalisi üçün 270 AZN, əmək qabiliyyətli şəxslər üçün 287 AZN, təqaüdçülər üçün 222 AZN, uşaqlar üçün isə 235 AZN nəzərdə tutulub. Bu isə çox azdır. Bu gün bazarda olan qiymət artımına və eyni zamanda səhiyyədə qiymətlərin yüksəlməsini nəzərə alsaq, istehlak səbətinin məbləği vətəndaşlar üçün çox aşağı olduğunu görərik. Bu meyar ailədə olan şəxslərin maaşları əsasında hesablanır. Əgər bu məbləğ sadaladığım məbləğlərdən aşağıdırsa, deməli həmin ailədə istehlak səbəti üçün lazımi məbləğ yoxdur.

Önümüzdəki aylarda bir neçə əmək haqqı və pensiya artımları olacağı bildirilib. Ümid edirik ki, istehlak səbətinin artırılması barədə də müəyyən qərar qəbul olunacaq. Çünki bu məbləğin artırılmaması mümkün deyil. Bazarda olan qiymətlər ilə istehlak səbətinin qiyməti bir-biri ilə uyuşmur. Uşaqların gələcəyi üçün 235 manat çox aşağı məbləğdir. Onlara gözəl gələcək vermək üçün bu məbləğ artırılmalıdır. Bu, bütün kateqoriyalar üçün keçərlidir. İstehlak səbətindəki məbləğ nə qədər yüksək olarsa, insanların rifahı da bir o qədər yaxşı olar. Çox güman ki, gələn il istehlak səbətinin bu kateqoriyaların uyğun qiymətlərində artım olacaqdır".