Bəxtiyar Məmmədov: "Son günlər metroda baş verən gecikmələr texniki problemlərdən qaynaqlanmır"

"Metroda baş verən gecikmələr, əgər texniki səbəbdən olursa, biz bunu ictimaiyyətlə bölüşürük. Amma dünən və bu gün səhər saatlarında və pik vaxtlarda sərnişin sıxlığı müşahidə olunduğu üçün minib-düşmə prosesi yubanır. Bu səbəbdən qatarlar normativlərlə müəyyən olunmuş müddətdən artıq stansiyada dayanmağa məcbur olurlar. Metropolitendə sərnişin sıxlığı olan stansiyalar üçün bu müddət 30 saniyə təyin edilib. Bəzən qatar 1, hətta 2 dəqiqə stansiyanı tərk edə bilmir. Bu zaman da avtomatik olaraq arxasında gələn qatar tuneldə gözləməli olur və ya sürətini azaltmalı olur.

“Operativ Media” xəbər verir ki, bu sözləri "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov deyib.

B. Məmmədov bildirib ki, maşinist istəsə belə qatarı stansiyaya gətirə bilmir: “Həmin ərazilərdə müəyyən blok sahələr var ki, onlar qatarların təhlükəsizliyini təmin edir. Sərnişin təhlükəsizliyi çox vacibdir. Platformalarda da sərnişin sıxlığı müşahidə olunarsa, bu zaman sürücü tam dəqiq əmin olmalıdır ki, qapılar bağlanıb və ya sərnişinə xələl gətirəcək hər hansısa maneə yoxdur. Yalnız bu hallar düzəldildikdən sonra qatar yola düşür.

Hər bir vətəndaşın metrodan istifadə etmək haqqı vardır. Biz sıxlıq zamanı bəzi müəyyən tədbirlər görürük. Bəzən stansiyaların girişlərində də görürsünüz ki, sərnişinlərin daha nizamlı hərəkət etmələrini təmin etmək üçün növbələr düzülür. Bu platformanı ifrat yüklənmədən qorumaq üçün atılmış addımdır. Çünki sərnişini təhlükəsiz daşımaq əsas vəzifədir”, - deyə mətbuat xidmətinin rəhbəri bildirib.