Beynəlxalq Biatlon İttifaqı (IBU) yay biatlonu üzrə dünya çempionatını 2026/2027-ci illər mövsümünün yarış cədvəlinə daxil etməyib.

​Operativ Media xəbər verir ki, qurumun İcraiyyə Komitəsinin 2024-cü ilin fevralında qəbul etdiyi qərara əsasən, sözügedən turnirin iki ildən bir təşkil olunması nəzərdə tutulurdu.

​Otepyada baş tutan 2024-cü il yarışından sonra növbəti çempionatın 2026-cı ildə keçirilməsi planlaşdırılsa da, görünür, turnir baş tutmayacaq. Yay mövsümündə əsas diqqətin regional turnirlərə yönəldilməsi qərara alınıb.

​Bununla yanaşı, ilk dəfə 2025-ci ildə əsası qoyulan "Loop One Festival" turniri oktyabrın 16–18-də Almaniyanın Münhen şəhərində ikinci dəfə təşkil ediləcək.

​Xatırladaq ki, 1996-cı ildən etibarən hər ilin avqust və ya sentyabr aylarında keçirilən yay biatlonu üzrə dünya çempionatında idmançılar qış biatlonundan fərqli olaraq xizəkli çarxlardan istifadə ediblər. Ötən dövr ərzində bu növdə ümumilikdə 29 turnir təşkil olunub.