Pxenyan Yaponiyanı müdafiə sahəsindəki yeni hesabatından hərbi gücünü artırmaq və müharibədən sonrakı məhdudiyyətlərdən imtina etmək üçün bəhanə kimi istifadə etməkdə təqsirləndirib.

​Operativ Media xəbər verir ki, bu barədə Koreyanın Mərkəzi Teleqraf Agentliyinin (KMTA) beynəlxalq təhlükəsizlik üzrə şərhçisi Kan Von Çolun məqaləsində bildirilib.

​Məqalədə qeyd olunur ki, Yaponiyanın son müdafiə üzrə "Ağ kitabı" hərbi maşının leqallaşdırılmasına və yenidən təcavüzkar siyasətə qayıdışa xidmət edən bir sənəddir. Tokionun KXDR və digər qonşu ölkələri "ciddi, birbaşa təhdid" və "ən böyük strateji çağırış" adlandırmasının əsas məqsədi öz silahlı qüvvələrini gücləndirməyə bəraət qazandırmaqdır.

​Müəllif vurğulayır ki, Yaponiya hakimiyyəti digər dövlətlərdən gələn təhlükələri bəhanə gətirərək ordusunu sürətlə modernləşdirir, İkinci Dünya müharibəsinin nəticələrini yenidən nəzərdən keçirməyə çalışır və ABŞ ilə hərbi ittifaqlarını dərinləşdirir. Şərhlərə əsasən, Tokionun müdafiə xarakterli adlandırdığı bu addımlar əslində regionda gərginliyi artırır.

​Bununla əlaqədar olaraq bildirilib ki, Şimali Koreya dövlət suverenliyini qorumaq, regionda sülh və sabitliyi təmin etmək üçün öz hərbi çəkindirmə potensialını daha da gücləndirmək məcburiyyətindədir. KMTA analitiki beynəlxalq birliyi Yaponiyanın "yeni militarizm" siyasətinə qarşı çıxmağa çağırıb.