Avropaya səyahət edən Azərbaycan vətəndaşları yeni viza nəzarət sistemindən keçməli olacaqlar

12 oktyabrdan Avropada yeni viza nəzarəti sistemi işə düşür. 

Operativ Media xəbər verir ki, Avropa İttifaqı (Aİ) 12 oktyabr 2025-dən etibarən “Entry/Exit System (EES)” adlı yeni biometrik giriş-çıxış sistemini tətbiq etməyə başlayacaq.

Yeni sistem Aİ-yə və Şengen zonası ölkələrinə viza ilə səfər edən bütün Aİ vətəndaşı olmayan şəxslərə, o cümlədən Azərbaycan vətəndaşlarına da şamil ediləcək.

EES sistemi ilə pasportlara möhür vurulmayacaq, bunun əvəzinə üz tanıma və barmaq izi kimi biometrik məlumatlar toplanacaq və rəqəmsal bazada qeyd olunacaq. Sərhəddən giriş və çıxış tarixləri avtomatik sistemə daxil ediləcək.

Məqsəd Aİ sərhədlərində keçid proseslərini rəqəmsallaşdırmaq, viza rejiminin pozulması hallarını daha asan müəyyənləşdirmək və təhlükəsizliyi artırmaqdır.

Beləliklə, Azərbaycan vətəndaşları da Avropaya səyahət zamanı sərhəddə biometrik qeydiyyatdan keçməli olacaqlar. Bu, ilk dəfə səfər edənlər üçün bir qədər vaxt apara bilər, lakin növbəti səfərlərdə keçid prosesi daha sürətli olacaq.

EES yalnız qısa müddətli vizalarla (90 günə qədər 180 günlük dövrdə) səfər edənlər üçün keçərlidir. Aİ-də uzunmüddətli viza və ya yaşayış icazəsi olan şəxslər sistemdən azad ediləcək.

Sistemin tətbiqi mərhələli şəkildə aparılacaq – əvvəlcə bəzi hava limanlarında və quru sərhədlərində, 2026-cı ilin ortalarına qədər isə bütün Şengen məkanında tam aktiv olacaq.