Qazaxıstanda yeni konstitusiyanın layihəsi təqdim edilib

Qazaxıstan 11 fəsil və 95 maddədən ibarət yeni konstitusiya layihəsini təqdim edib.

Operativ Media xəbər verir ki, bu barədə Qazaxıstan Respublika Konstitusiya Məhkəməsi məlumat yayıb.

Bildirilib ki, qazax dili dövlət dili statusunu qoruyub saxlayacaq.

Yeni konstitusiyada suverenlik, müstəqillik, unitar quruluş, ərazi bütövlüyü və idarəetmə forması dəyişməz dəyərlər kimi müəyyən ediləcək.

Bundan əlavə, insan kapitalının, təhsilin, elmin və innovasiyanın inkişafı dövlət üçün strateji fəaliyyət sahələri hesab ediləcək.

Xarici siyasətdə Qazaxıstan sülh, əməkdaşlıq, daxili işlərə qarışmamaq və beynəlxalq mübahisələrin sülh yolu ilə həlli prinsiplərinə sadiq qalacaq.

Qazaxıstan vətəndaşı olan, ən azı 40 yaşı olan, dövlət dilində sərbəst danışan, son 15 ildə Qazaxıstanda yaşayan, ali təhsilli və dövlət qulluğunda və ya seçkili vəzifədə ən azı 5 illik təcrübəsi olan şəxs prezidentliyə namizəd ola bilər.

Prezidentin vaxtından əvvəl istefası halında, vəzifələr müvəqqəti olaraq vitse-prezidentə, parlamentin spikerinə və ya baş nazirə veriləcək.