Litva Rusiya səfirliyinə etiraz notası göndərdi

Litva Xarici İşlər Nazirliyi (XİN) Vilnüsdəki Rusiya səfirliyinə Ukraynanın mülki əhalisinə, enerji və digər kritik infrastruktur obyektlərinə hücumlara görə etiraz notası göndərib.

Operativ Media xəbər verir ki, bu barədə məlumat Litva XİN-in rəsmi saytında yayımlanıb.

Xarici siyasət idarəsinin bəyanatında bildirilib:

“Birmənalı şəkildə mülki hədəfləri — mədənçilərlə dolu avtobus, Drujkovka bazarı və ya təcili yardım maşını, həmçinin istilik və elektrik enerjisi şirkətlərini hədəf seçməklə — Rusiya danışıqlara qatılmasının sadəcə imitasiya olduğunu göstərir.”

Bəyanatda əlavə olunub ki, Moskva müharibəni tezliklə dayandırmaqda maraqlı deyil. Etiraz notasında vurğulanır ki, Rusiyanın Ukraynada törətdiyi hərbi cinayətlərin təşkilatçıları və günahkarları, iddia müddətindən asılı olmayaraq, tapılacaq və məsuliyyətə cəlb ediləcəklər.

XİN qeyd edib ki, göndərilən etiraz notaları gələcəkdə Rusiya siyasi və hərbi rəhbərliyinin məsuliyyətini təmin etmək üçün sübut kimi istifadə olunacaq.