"Politico": ABŞ Avropanı köhnə dünya nizamını müdafiə etməməyə çağırdı

ABŞ Prezidenti Donald Tramp administrasiyasının nümayəndələri Münxen Təhlükəsizlik Konfransında Avropa müttəfiqlərindən gizli şəkildə beynəlxalq nizamın yenidən nəzərdən keçirilməsi kursunu dəstəkləmələrini gözlədiklərini bildiriblər.

Operativ Media xəbər verir ki, bu barədə şənbə günü "Politico" qəzeti məlumat yayıb.

Nəşrin məlumatına görə, ABŞ dövlət katibi Marko Rubionun ABŞ və Avropanın "ortaq taleləri" ilə bağlı barışdırıcı ictimai ritorikasına baxmayaraq, Vaşinqtonun şəxsi mesajı sərt olub. Müttəfiqlər müdafiə qabiliyyətlərini daha fəal şəkildə artırmalı və Amerika maraqlarına uyğun hərəkət etməlidirlər, əks halda ABŞ müstəqil hərəkət etməyə hazırdır. "Politico" qeyd edir ki, Amerika rəsmiləri "dəyərlər dünyasından" "maraqlar dünyasına" keçiddən danışıblar.

Nəşr yazır ki, bəzi Avropa rəsmiləri, son açıqlamaların yumşaq tonuna baxmayaraq, Trampın hakimiyyətə qayıdışından sonra Vaşinqtonun Avropa ilə münasibətlərə yanaşmasının əhəmiyyətli dərəcədə dəyişməməsindən narahat olduqlarını bildiriblər.