UEFA Hakimlər Komitəsi VAR müdaxiləsindən sonra meydançanın kənarındakı monitorda epizodların təkrarına baxılması üzrə yeni proseduru rəsmən təsdiq edib.

​Operativ Media xəbər verir ki, bu qaydalar həm daxili yarışlarda, həm də UEFA-nın bayrağı altında keçirilən beynəlxalq turnirlərdə tətbiq olunmalıdır. Qurumun rəsmi saytında yer alan məlumatda bildirilir ki, məqsəd hakimlərə kömək etmək və videoassistentlərə inamı artırmaq üçün vahid dörd mərhələli baxış proseduruna riayət olunmasını təmin etməkdir.

​Standart dörd mərhələli mexanizm aşağıdakı kimi müəyyən edilib:

​1-ci mərhələ (Qayda pozuntusunun təyini): Monitorinq olunan epizod qayda pozuntusunun aydın göründüyü ən dürüst bucaqdan baxılmalıdır. Təmas nöqtəsini və ya əsas məqamı dəqiq müəyyən etmək üçün lazım gəldikdə dondurulmuş kadr tətbiq edilə bilər. Əsas hədəf dərhal qərar vermək deyil, hadisəni dəqiq təsbit etməkdir.

​2-ci mərhələ (Texniki qiymətləndirmə): Referi epizodu iri planda analiz edir. Bu zaman oyunçunun hərəkətini tam izləmək və detallı texniki qiymət vermək üçün normal sürətdən iki dəfə yavaş göstərilən iki-üç təkrar kadrdan istifadə olunur.

​3-cü mərhələ (Oyun dinamikasının qiymətləndirilməsi): Hərəkətlərin texniki tərəfi öyrənildikdən sonra epizod dinamikada nəzərdən keçirilir. Geniş bucaq və normal sürətdə təqdim olunan iki-üç təkrar vasitəsilə hücumun inkişafı, mübarizə anı və ondan sonrakı bir neçə saniyə izlənilir. Bu mərhələ hərəkətin intensivliyini, mübarizənin təsirini və digər taktiki amilləri qiymətləndirməyə imkan verir.

​4-cü mərhələ (Yekun qərar): Baxış prosesi hakimin yekun rəyini doğruldan ən inandırıcı kadrın nümayişi ilə başa çatır. Bu, qəbul edilən qərarın ən tutarlı və epizoda birbaşa aidiyyəti olan video-sübutlara əsaslandığını təmin edir.