Tramp JCPOA-nı tarixin ən pis razılaşmalarından biri adlandırıb

ABŞ Prezidenti Donald Tramp İranın nüvə proqramı ilə bağlı 2015-ci ildə imzalanmış Birgə Hərtərəfli Fəaliyyət Planını (JCPOA) dünya tarixinin ən pis razılaşmalarından biri adlandırıb.

Operativ Media xəbər verir ki, Tramp bu fikirləri noyabrda keçiriləcək Konqresə aralıq seçkiləri ərəfəsində Dallasda Respublikaçılar Partiyasının milli qurultayında səsləndirib.

Tramp bildirib ki, ABŞ-nin 44-cü prezidenti Barak Hüseyn Obama İranla JCPOA sazişini bağlayıb və bu sənəd “tarixdəki ən pis razılaşmalardan biri” olub.

2015-ci ildə İran, Böyük Britaniya, Almaniya, Çin, Rusiya, ABŞ və Fransa JCPOA-nı imzalayıb. Saziş Tehranın nüvə silahı hazırlaması ilə bağlı Qərbin 2002-ci ildən irəli sürdüyü ittihamlar fonunda yaranmış böhranın aradan qaldırılmasını nəzərdə tuturdu.

2018-ci ildə isə Donald Tramp ABŞ-nin sazişdən çıxdığını açıqlayıb və İrana qarşı bütün Amerika sanksiyalarını bərpa edib.

ABŞ Prezidenti həmçinin iddia edib ki, Vaşinqton sazişdən çıxmasaydı, İranın artıq nüvə silahı olardı. Tramp ABŞ-nin İranın nüvə obyektlərinə B-2 bombardmançıları ilə zərbələr endirməsini də bu kontekstdə qeyd edib.

Trampın sözlərinə görə, ABŞ ilə İran arasındakı münaqişə Konqresə keçiriləcək aralıq seçkilərdən qısa müddət sonra başa çatacaq. O, Tehranın yeni razılaşma əldə etməyə “ümidsiz şəkildə” çalışdığını bildirib.

ABŞ və İsrail İranla müharibəyə fevralın 28-də başlayıb. İyunda Vaşinqton və Tehran bütün cəbhələrdə, o cümlədən Livanda döyüşlərin dərhal dayandırılmasını nəzərdə tutan anlaşma memorandumu imzalayıb.

Lakin iyulun 8-nə keçən gecə ABŞ İrana qarşı genişmiqyaslı zərbələri yenidən başlayıb. Vaşinqton bunu İranın əldə olunan razılaşmanın Hörmüz boğazı ilə bağlı şərtlərini pozması ilə əsaslandırıb.

ABŞ Konqresinə aralıq seçkiləri noyabrın 3-də keçiriləcək. Seçkilərdə Senatın 100 üzvündən 33-ü və Nümayəndələr Palatasının bütün 435 üzvü yenidən seçiləcək. Hazırda Respublikaçılar Partiyası Konqresin hər iki palatasına nəzarət edir.