Azərbaycan ADEX-2026 sərgisində Türkiyənin "Baykar" şirkəti ilə uzaqmənzilli MIZRAK kamikadze dronunun tədarükünə dair saziş imzalayıb və bu modelin məlum olan ilk xarici alıcısı olub.
Bu barədə Operativ Media "TURDEF"ə istinadən xəbər verir.
MIZRAK “Baykar” şirkətinin uzaqmənzilli birtərəfli hücum vasitələri xəttinin bir hissəsi kimi SİVRİSİNEK və K2 kamikadze PUA-larından qısa müddət sonra təqdim edilib.
K2 “Bayraktar TB2”nin bir variantı əsasında hazırlanmış, 2 000 kilometrədək məsafə qət edə bilən və 200 kiloqramlıq döyüş başlığı daşıyan uzaqmənzilli ağır zərbə PUA-sıdır. SİVRİSİNEK isə nisbətən aşağı qiymətli konstruksiyası və çevik buraxılış imkanları ilə seçilir. MIZRAK isə modullu konstruksiyaya malik olmaqla, radiasiyaəleyhinə sursat kimi istifadə oluna bilir.
MIZRAK-ın modul bölməsində radar siqnallarını aşkar etmək üçün passiv RF axtarıcısı ilə təchiz edilmiş iki 20 kiloqramlıq döyüş başlığı və ya bir 20 kiloqramlıq döyüş başlığı yerləşdirilə bilər. Standart hədəfləmə sistemi gimbal EO sistemi, həmçinin GNSS/INS-dən ibarətdir.
SİVRİSİNEK ilə müqayisədə daha ağır olan MIZRAK-ın uçuşa hazırlanması zamanı eniş qurğusundan istifadə edilə, həmçinin RATO (raketlə gücləndirilmiş uçuş) sistemi ilə havaya qalxış həyata keçirilə bilər. Bu, aşağı qanad yükü və qanadların konstruktiv dəstəyi nəzərə alınmaqla, qısa məsafədən uçuşa imkan verir.
MIZRAK-ın əvvəllər İsraildən alınmış Harpy və Harop tipli kamikadze PUA-larından əsas fərqləri mürəkkəb buraxılış infrastrukturundan asılılığın olmaması, faydalı yükün modulluğu və “Bayraktar TB2” və “AKINCI” ilə qarşılıqlı fəaliyyət imkanlarıdır.
