Britaniya Bakıda keçiriləcək COP29 sammitində öz üzərinə əlavə öhdəliklər götürəcək

Böyük Britaniya hökuməti bu il BMT-nin iqlim sammitində elan olunacaq istixana qazları emissiyalarının azaldılması ilə bağlı əlavə öhdəliklər götürməyi nəzərdən keçirir.

"Operativ Media" xəbər verir ki, bu barədə "The Guardian" məlumat yayıb.

Ümid edilir ki, plan emissiyaların azaldılması üzrə qlobal ambisiyaların başlamasına kömək edəcək və digər ölkələri də bu addımı atmağa təşviq edəcək.

Böyük Britaniyanın enerji təhlükəsizliyi və “xalis sıfır” emissiyalar üzrə dövlət katibi Ed Milibend yeni bir hədəfi bir neçə ay öncədən elan etməyi ümid edir və baş nazir Keir Starmerin dəstəyi ilə Birləşmiş Krallığı iqlim danışıqlarında beynəlxalq səhnədə lider mövqeyə gətirmək üçün çalışır.

Bildirilib ki, Starmer müxalifət lideri olduğu zaman əvvəlki sammitdə, COP28-də iştirak etmişdi və bu ilin noyabr ayında Azərbaycanda keçiriləcək COP29-a dəvət alıb.

Qeyd edək ki, Paris İqlim Sazişi çərçivəsində müəyyən olunan əsas hədəflərdən biri qlobal temperatur artımını sənayedən əvvəlki səviyyələrdən 1,5°C-dən aşağı saxlamaqdır. Bu məqsədə çatmaq üçün ölkələr öz milli səviyyədə müəyyən edilmiş töhfələrini (Nationally Determined Contributions - NDCs) təqdim etməyə və yeniləməyə borcludurlar. Əgər mövcud tədbirlər kifayət etməzsə, ölkələr daha sərt hədəflər müəyyən etməli və bu tədbirləri təqdim etməlidirlər.