"AvtoVAZ" "Lada Granta"nın iki yanacaqlı versiyasını təqdim edib

"AvtoVAZ" şirkəti təbii qazla işləyən qaz avadanlığı ilə təchiz edilmiş "Lada Granta" sedanının iki yanacaqlı versiyasının istehsalına başladığını açıqlayıb.

"Operativ Media" xəbər verir ki, bu barədə yanvarın 12-də müəssisənin mətbuat xidməti məlumat yayıb.

"AvtoVAZ" uzun müddətdir "Lada"nın qaz avadanlığı ilə təchiz edilməsi ilə məşğuldur.

“Təcrübə göstərdi ki, təbii metan qazından istifadə mühərrikin ömrünü artıra və yanacaq xərclərini iki-üç dəfə azalda bilər. Bu, bütün müştərilərimiz üçün və xüsusilə işə gedən və ya tez-tez səyahət edənlər üçün əla təklifdir. Bu halda yanacağa qənaət xüsusilə nəzərə çarpır”, - deyə "AvtoVAZ"ın satış direktoru Vitali Osipov bildirib.

İki yanacaqlı "Lada Granta" həm qazla, həm benzinlə işləyə bilər. Qaz silindrinə quraşdırılmış qoruyucu və yüksək sürətli klapan yanacaq avadanlığının zədələnməsi halında təhlükəsizliyi təmin edir. Silindr 80 litr qaz üçün nəzərdə tutulub və 340 litr həcmi olan baqajda yerləşdirilib.

Orta qaz sərfiyyatı 100 km-ə 6,1 kubmetrdir. Qaz və benzinlə doldurulmuş avtomobil yanacaq doldurmadan 1000 km məsafə qət edə bilər.