Dünyanın ən zəngin 10 adamının sərvəti ABŞ prezident seçkilərində respublikaçı Donald Trampın qələbəsindən sonra ümumilikdə rekord həddə - 63,5 milyard dollar artıb.
"Operativ Media" xəbər verir ki, bu barədə "Bloomberg" məlumat yayıb .
Agentliyin məlumatına görə, bu, 2012-ci ildən bu yana ən böyük gündəlik artım olub.
İlon Maskın var-dövləti Trampın qalib gəlməsindən sonra 10,1% (26,5 milyard dollar) artaraq 290,3 milyard dollara çatıb. "Amazon" un qurucusu Ceff Bezosun sərvəti bir gündə 3,2% (7,14 milyard dollar) artıb. "Oracle" korporasiyasının rəhbəri Lari Ellisonun sərvəti isə 5,4% (9,88 milyard dollar) artıb.
Bloomberg yazır ki, milyarderlərin var-dövlətinin kəskin artmasının səbəbi ABŞ şirkətlərinin səhmlərinin qiymətində müşahidə olunan sıçrayışdır. Bu artım, Trampın Ağ Evə gəlməsinin vergilərin azaldılmasına və maliyyə tənzimləmələrinin yumşaldılmasına kömək edəcəyinə dair gözləntilərdən qaynaqlanır.
