ABŞ-nin xüsusi nümayəndəsi Livanı “uğursuz dövlət” adlandırıb
ABŞ-nin Suriya üzrə xüsusi nümayəndəsi şənbə günü Livanı “uğursuz dövlət” adlandırıb və Suriyanın tədricən ABŞ-a yaxınlaşdığı bir vaxtda Vaşinqtonun Beyrutun “iflic olmuş hökumətindən” məyus olduğunu bildirib.
Operativ Media xəbər verir ki, bu haqda "Associated Press" agentliyi məlumat yayıb.
Bəhreyndə keçirilən “Manama Dialoqu” sammitində “ABŞ-nin Şam siyasəti” mövzusunda müzakirələr zamanı çıxış edən Tomas Barak Suriyada dekabr ayında prezident Bəşər Əsədin devrilməsindən sonra baş verən prosesləri alqışlayıb.
O, Suriyanın yeni prezidenti Əhməd əl-Şaaranın noyabrın 10-da Vaşinqtona səfərinin gözlənildiyini təsdiqləyib. Bu, Suriyanın 1946-cı ildə müstəqillik qazanmasından sonra ölkə prezidenti tərəfindən həyata keçiriləcək ilk belə səfər olacaq.
Barak həmçinin Suriyanın İŞİD-ə qarşı mübarizə aparan ABŞ-nin rəhbərlik etdiyi koalisiyaya qoşulmasının gözlənildiyini açıqlayaraq, bunu “böyük addım” və “müsbət hadisə” adlandırıb. Koalisiyaya İŞİD-in yenidən dirçəlməsinin qarşısını almaq üçün çalışan 80-ə yaxın ölkə daxildir.
Livanla bağlı danışan Barak bildirib ki, bu ölkə Yaxın Şərqdəki yeni regional dəyişikliklərə “uyğun olmayan” yeganə dövlətdir.
“Dövlət – Hizbullahdır”, – deyən Barak qeyd edib ki, hərəkat elektrik və su kimi əsas xidmətlərin xroniki olaraq etibarsız olduğu bir ölkədə, Livan dövlətinin edə bilmədiyini – yəni öz tərəfdarlarını və döyüşçülərini təmin etməyi – bacarır.
“Odur ki, bu məsələ livanlıların özündən asılıdır. ABŞ elə bir bataqlığa düşməyəcək ki, orada xarici terror təşkilatının və uğursuz dövlətin diktə etdiyi şərtlərlə hərəkət etsin, daha çox resurs, pul və yardım tələb etsin”, – deyə o vurğulayıb.
Barak əlavə edib ki, ABŞ regional mübahisələrə birbaşa müdaxilə etməyəcək, lakin İsrailin Livana qarşı təcavüzünü artırması halında Vaşinqton müttəfiqini dəstəkləyəcək.
İsrail son vaxtlar Livanın cənubuna endirdiyi zərbələri intensivləşdirib. Hər iki tərəf bir-birini ötən ilin noyabrında İsrail və Hizbullah arasında müharibəyə rəsmən son qoyan atəşkəsi pozmaqda ittiham edir.
