Ərdoğan: Türkiyə İƏT himayəsi altında Suriyaya dəstək proqramına başlayır
Türkiyə prezidenti Rəcəb Tayyib Ərdoğan bəyan edib ki, Türkiyə İslam Əməkdaşlıq Təşkilatının (İƏT) himayəsi altında Suriya və onun dövlət qurumlarına dəstək proqramına başlayır.
Operativ Media xəbər verir ki, bu haqda. Türkiyə Prezidenti Rəcəb Tayyib Ərdoğan İstanbulda keçirilən komitə iclasında çıxışı zamanı bildirib.
“Əsas prioritetimiz qonşumuz Suriyanın yenidən qurulması və onun tezliklə əvvəlki vəziyyətinə qaytarılmasıdır. Bu məqsədlə bu gün İƏT-in İqtisadi və Ticarət Əməkdaşlığı üzrə Daimi Komitəsinin himayəsi altında Suriya üçün xüsusi dəstək proqramına start veririk. Proqram insan və institusional potensialın gücləndirilməsinə töhfə verəcək, həmçinin bizə təhsil, ekspert mübadiləsi və ehtiyacların qiymətləndirilməsi kimi sahələrdə Suriyanı dəstəkləməyə imkan yaradacaq. Bu, proqramın həyata keçirilməsinə əvəzsiz töhfə olacaq”, – deyə o bildirib.
Türkiyə lideri vurğulayıb ki, “sanksiyalar Suriyanın iqtisadi inkişafı üçün ciddi maneə yaradır, lakin ərəb və müsəlman ölkələrinin birgə səyləri nəticəsində bu maneələr tədricən aradan qaldırılır”.
“Hazırkı mərhələdə biz özəl sektoru Suriya bölgəsinə sərmayə yatırmağa təşviq edirik. Region iqtisadiyyatları ilə inteqrasiya həm Suriyanın özü, həm də bütün bölgəmiz üçün əhəmiyyətli faydalar gətirəcək. İnteqrasiyanın əsas tərkib hissəsi kimi nəqliyyat layihələrinin reallaşdırılmasına diqqət yetirilməsi həyati əhəmiyyət daşıyır”, – Ərdoğan qeyd edib.
Onun sözlərinə görə, Türkiyə “nəqliyyat və təhsildən tutmuş təhlükəsizlik, ticarət, səhiyyə və sosial xidmətlərə qədər müxtəlif sahələrdə Suriya xalqını dəstəkləməyə davam edir”.
“Ölkənin siyasi birliyinin və ərazi bütövlüyünün qorunması, eləcə də İƏT və İslam dünyasının dəstəyinin təmin olunması Suriyanın uzunmüddətli rifahı üçün son dərəcə vacibdir”, – dövlət başçısı əlavə edib.
