Donald Tramp: Özbəkistan üç il ərzində ABŞ iqtisadiyyatına təxminən 35 milyard dollar sərmayə qoyacaq

ABŞ Prezidenti Donald Tramp bəyan edib ki, Özbəkistan üç il ərzində məhsul alışı və investisiyalar vasitəsilə Amerika iqtisadiyyatına təxminən 35 milyard dollar sərmayə yatıracaq.

Operativ Media xəbər verir ki, Amerika lideri bu barədə “Truth Social” sosial şəbəkəsində paylaşım edib:

“Mən ABŞ və Özbəkistan arasında inanılmaz ticarət-iqtisadi sazişin imzalanmasını elan etməkdən məmnunam. Növbəti üç il ərzində Özbəkistan Amerikanın əsas sənaye sahələrinə – o cümlədən əsas minerallar, aviasiya, avtomobil hissələri istehsalı, infrastruktur, kənd təsərrüfatı, enerji, kimya, informasiya texnologiyaları və digər istiqamətlərə təxminən 35 milyard dollar sərmayə qoyacaq. Növbəti on il ərzində isə bu rəqəm 100 milyard dollardan çox olacaq”, – Tramp qeyd edib.

ABŞ Prezidenti həmçinin Özbəkistan Prezidenti Şavkat Mirziyoyevə təşəkkürünü bildirib və Amerika Birləşmiş Ştatlarının ölkə ilə “uzunmüddətli və məhsuldar əməkdaşlığa” sadiq olduğunu vurğulayıb.

Qeyd edək ki, bundan əvvəl Donald Tramp Ağ Evdə Qazaxıstan, Qırğızıstan, Tacikistan, Türkmənistan və Özbəkistan liderləri ilə görüş keçirib.