BMT: Sudanın Darfur və Kordofan bölgələrində humanitar vəziyyət kəskinləşib
Sudanın Darfur və Kordofan bölgələrinin əhalisi zorakılıqlar nəticəsində ağır vəziyyətdə qalıb və təcili yardıma ehtiyac duyur.
Operativ Media xəbər verir ki, bu barədə BMT-nin Humanitar Məsələlərin Əlaqələndirilməsi Ofisi (OCHA) məlumat yayıb.
Qurum bildirib ki, 2025-ci il üçün beynəlxalq humanitar cavab planı hazırda cəmi 28 faiz maliyyələşdirilib.
OCHA-nın bəyanatında qeyd olunur: “Darfur və Kordofan bölgələrində artan humanitar ehtiyacların qarşılanması üçün təcili əlavə dəstəyə ehtiyac var. Bu il Sudan üçün nəzərdə tutulan humanitar yardım planı bu ehtiyaclara baxmayaraq, cəmi 28 faiz maliyyələşdirilib. Bu günə qədər tələb olunan 4,16 milyard dollardan yalnız 1,17 milyard dollar təmin edilib”.
Qurum həmçinin son zorakılıqlar səbəbindən Şimali Darfur əyalətinin El Faşer şəhərindən qaçan minlərlə ailənin üzləşdiyi ağır humanitar vəziyyətə diqqət çəkib. Tawila şəhəri və onun ətrafında məcburi köçkünlər kifayət qədər qida, təmiz su, sığınacaq və tibbi yardım olmadan son dərəcə çətin şəraitdə yaşayırlar. Tawila El Omda düşərgəsində yeni gələn 3000-dən çox qaçqın əsas ehtiyaclar və sığınacaq yardımı baxımından ciddi çətinliklərlə üzləşib. Yaralılar, əlillər və küçə uşaqları da daxil olmaqla bir çox insan sanitariya şəraiti olmadan açıq havada yatmağa məcburdur. Oxşar vəziyyət El Faşerdən qaçan 6500-dən çox insanın “sığınacaqsız və əsas ehtiyaclardan məhrum olduğu” Daba El Naira və Umm Jangour düşərgələrində də müşahidə olunur.
Döyüşlərin davam etdiyi Qərbi Kordofan əyalətindən BMT-yə dinc əhali arasında itkilər barədə məlumat daxil olub. Onlarla ailə Əl Udaya rayonundan qaçaraq Şimali Kordofana sığınmağa məcbur qalıb. Hazırda 250-yə yaxın köçkün dörd müvəqqəti sığınacaqda yerləşdirilib. OCHA-nın məlumatına görə, bölgədəki vəziyyət “son dərəcə qeyri-sabit olaraq qalır”.
Xatırladaq ki, Suveren Şuranın (müvəqqəti idarəetmə orqanı) sədri və ordu komandanı Əbdülfəttah əl-Burhan ilə Sürətli Müdaxilə Qüvvələrinin (RİF) rəhbəri Məhəmməd Həmdan Daqalo arasında fikir ayrılıqları səbəbindən Sudanda vəziyyət 2023-cü ilin aprelindən kəskinləşib. Xartumda başlayan toqquşmalar qısa müddətdə ölkənin digər bölgələrinə də yayılıb. Mütəxəssislərin hesablamalarına görə, münaqişə nəticəsində azı 40 min insan həlak olub, təxminən 12 milyon sudanlı evlərini tərk etməyə məcbur qalıb. Onların böyük hissəsi aclıq həddinə çatıb.
