Aİ Gürcüstanın təhlükəsizlik və cinayətkarlıqla bağlı regional layihələrdə iştirakını dayandırıb
Avropa İttifaqı (Aİ) Gürcüstanın təhlükəsizlik və mütəşəkkil cinayətkarlıqla bağlı Aİ tərəfindən maliyyələşdirilən regional layihələrdə iştirakını dayandırıb.
Operativ Media "Rustavi 2"yə istinadən xəbər verir ki, bu barədə Aİ-nin Gürcüstandakı səfiri Pavel Qerçinskinin Gürcüstan Xarici İşlər Nazirliyinə göndərdiyi məktubda bildirilir.
Gürcüstanın xarici işlər nazirinin birinci müavini Giorgi Liaşviliyə ünvanlanan məktubda qeyd olunur:
“Gürcüstandakı müstəsna hallar və Gürcüstanın Aİ-yə üzvlük prosesinin de-fakto dayandırılması ilə nəticələnən Avropa Şurasının 27 iyun 2024-cü il tarixli rəyinə uyğun olaraq, sizə məlumat verirəm ki, Gürcüstanın təhlükəsizlik və mütəşəkkil cinayətkarlıqla bağlı Aİ tərəfindən maliyyələşdirilən növbəti regional layihələrdə iştirakı dayandırılıb”.
Qerçinskinin məktubunda aydınlaşdırılır ki, söhbət üç layihədən gedir:
Avropolun dəstəklədiyi Şərq Tərəfdaşlığı çərçivəsində mütəşəkkil cinayətkarlıqla mübarizə layihəsi,
TOPCOP II – mütəşəkkil cinayətkarlıqla mübarizə üzrə layihə,
və EU4MD II – Aİ-də narkotik ticarətinin monitorinqi üzrə layihə.
Məlumata görə, Gürcüstanın bu proqramlardakı iştirakı 15 oktyabr tarixindən etibarən dayandırılıb. Qərar Gürcüstanın Daxili İşlər Nazirliyi və Ədliyyə Nazirliyinin nümayəndələrinə də şamil olunur.
