Malayziya sahillərində miqrantları daşıyan qayıq batıb: 7 nəfər ölüb, 13 nəfər xilas edilib

Malayziya xilasediciləri Myanmadan olan yeddi miqrantın cəsədini sudan çıxarıb və onlarla insanın olduğu qayıqdan 13 nəfəri sağ tapıblar.

Operativ Media xəbər verir ki, bu haqda "Associated Press" nəşri məlumat yayıb.

Malayziya Dəniz Xilasetmə Agentliyinin birinci admiralı Romli Mustafa ilkin araşdırmaya istinadən bildirib ki, qayıq Myanmanın Rakxayn əyalətindəki Buthidaung şəhərindən təxminən 300 nəfərlə yola düşüb.

Polis və dəniz agentliyinin məlumatına görə, gəmi Malayziyaya yaxınlaşarkən sərnişinlərin üç kiçik qayığa bölündüyü güman edilir.

Qayıqlardan birinin cümə axşamı Tailandın cənubundakı Tarutao adasının yaxınlığında batdığı, qurbanların bəzilərinin isə Malayziyanın şimalındakı Langkavi adasına aparıldığı ehtimal olunur. Hadisənin dəqiq vaxtı və yeri hələlik məlum deyil.