Rubio: ABŞ Ukrayna ilə bağlı Rusiya üçün həqiqətən nəyin vacib olduğu barədə məlumat alıb
Dövlət katibi Marko Rubio bəyan edib ki, ABŞ prezident administrasiyası son bir neçə ay ərzində Ukrayna böhranının həllində Rusiya üçün həqiqətən hansı məsələlərin vacib olduğunu müəyyən etməyə dair əhəmiyyətli məlumat əldə edib.
Operativ Media xəbər verir ki, o, bunu Cenevrədə ABŞ-Ukrayna sülh danışıqlarında fasilə zamanı jurnalistlərə açıqlamasında bildirib.
Rubio qeyd edib ki, Amerika və Ukrayna nümayəndə heyətləri hazırda Ukraynadakı böhranın həllinə dair plan üzərində düzəlişlər hazırlayırlar və bu dəyişikliklər hələ iki ölkənin rəhbərliyi tərəfindən təsdiqlənməyib. “Əlbəttə, tənliyin Rusiya tərəfi də var. Lakin yenə də inanırıq ki, son doqquz ay ərzində onlar üçün həqiqətən vacib olan məsələlər barədə kifayət qədər ciddi anlayış formalaşdırmışıq”, — deyə o, CNN telekanalına açıqlamasında bildirib.
Bazar günü Volodimir Zelenski Ukrayna nümayəndə heyəti, Avropa tərəfdaşları və Amerika nümayəndə heyəti arasında münaqişəyə son qoymaq üçün atılacaq addımların müzakirəsi məqsədilə İsveçrədə görüşlərin başladığını elan edib. Daha əvvəl "Reuters" agentliyi adının çəkilməsini istəməyən amerikalı rəsmiyə istinadən xəbər vermişdi ki, Vaşinqton və Kiyev nümayəndələri Cenevrədəki danışıqlarda Ukraynadakı münaqişənin sülh yolu ilə nizamlanmasına dair ABŞ planının yekun detallarını razılaşdırmağı planlaşdırırlar.
Şənbə günü Aİ liderləri Vaşinqtonun sülh planının bir neçə bəndinə və onun yenidən nəzərdən keçirilməsi zərurətinə razı olmadıqlarını bildiriblər. Bild qəzeti öz mənbələrinə istinadən yazıb ki, Almaniya hökuməti ABŞ-nin təşəbbüsündən son dərəcə narahatdır və diplomatik əks tədbirlər üzərində işləməyə başlayıb. Qərb mediasına sızdırılan plana əsasən, ABŞ və digər ölkələrdən Rusiyanın Krım, Donbas və Ukraynanın verməyə məcbur olacağı digər ərazilər üzərində suverenliyini tanıması tələb olunacaq. Əvəzində Kiyev Amerika və Avropa təhlükəsizlik zəmanətləri alacaq. Ukrayna qoşunlarının çıxarılması nəzərdə tutulan ərazilərdə demilitarizasiya zonası yaradılmalıdır.
“Axios”un ABŞ rəsmisinə istinadən verdiyi məlumata görə, Xerson və Zaporojye vilayətlərində münaqişə tərəfləri arasında təmas xətti dondurulacaq, Rusiya isə bəzi əraziləri Ukraynaya qaytarmağa məcbur olacaq. Bundan başqa, Ukrayna ordusu əhəmiyyətli dərəcədə ixtisar ediləcək, ölkə uzaqmənzilli silahlardan məhrum ediləcək. Dövlət ərazisində xarici qoşunların yerləşdirilməsi qadağan olunacaq, rus dili isə rəsmi dil statusu alacaq. "Bloomberg" yazıb ki, ABŞ-nin yeni planı Rusiyaya qarşı sanksiyaların ləğvini də nəzərdə tutur.
