Türk Hava Yolları 2,3 milyard dollardan çox investisiya ilə dünyanın ən böyük yük terminalını quracaq

Türkiyə aviaşirkəti olan "Turkish Airlines" 100 milyard türk lirəsi (2,3 milyard dollardan çox) sərmayə ilə dünyanın ən böyük yük terminalı və təyyarə içi iaşə obyekti inşa edəcəyini açıqlayıb.

Operativ Media xəbər verir ki, bu barədə  "Anadolu" agentliyi məlumat yayıb.

Aviaşirkət bildirib ki, investisiya qoyuluşu və yük terminalının və təyyarədə iaşə obyektinin yaradılması 26 min yeni iş yeri yaradacaq.

Layihələrin yeri qeyd olunmasa da, Türkiyənin ticarət paytaxtı və iki böyük beynəlxalq hava qovşağının yerləşdiyi İstanbul ehtimal olunur.

İstanbulda yerləşən Türk Hava Yolları, ildə 85 milyondan çox sərnişin və 2 milyon ton yük daşıyan dünyanın ən böyük aviaşirkətlərindən biridir.