Zelenski BƏƏ-də keçirilən üçtərəfli danışıqlarla bağlı paylaşım edib
Ukrayna Prezidenti Volodimir Zelenski Birləşmiş Ərəb Əmirliklərində (BƏƏ) keçirilən üçtərəfli danışıqların başa çatması ilə bağlı “X” sosial şəbəkə hesabında paylaşım edib.
Operativ Media -nın məlumatına görə, Zelenskinin paylaşımında bildirilir ki, Ukrayna nümayəndə heyəti hesabat təqdim edib və BƏƏ-də keçirilən görüşlər yekunlaşıb. Qeyd olunub ki, bu format uzun müddətdən sonra ilk dəfə olaraq iki gün davam edən üçtərəfli danışıqlar şəklində təşkil olunub və müzakirələr konstruktiv mühitdə baş tutub.
Paylaşımda vurğulanıb ki, danışıqlarda hər üç tərəfin hərbi nümayəndələri iştirak edib. Ukrayna tərəfindən Rustem Umerov, Kirilo Budanov, Andriy Hnatov, Davıd Araxamiya, Sergiy Kıslitsa və Vadim Skibitski təmsil olunublar. ABŞ nümayəndə heyətinə Stiv Uitkoff, Cared Kuşner, Den Driskoll, Aleksus Qrinkeviç və Coş Qruenbaum daxil olub. Rusiya tərəfi isə hərbi kəşfiyyat və silahlı qüvvələrin nümayəndələri ilə təmsil edilib.
Zelenski bildirib ki, danışıqların əsas mövzusu müharibənin başa çatdırılması üçün mümkün parametrlər olub. O, müharibənin dayandırılması prosesində ABŞ-ın monitorinq və nəzarət mexanizmlərinin vacibliyini xüsusi qeyd edib.
Paylaşımda həmçinin Amerika tərəfinin müharibənin bitməsi ilə bağlı parametrlərin rəsmi şəkildə rəsmiləşdirilməsi formatları və bunun üçün tələb olunan təhlükəsizlik şərtləri məsələsini gündəmə gətirdiyi bildirilib.
Görüşlərin nəticəsi olaraq tərəflərin müzakirə olunan məsələlər barədə öz paytaxtlarında rəhbərliklərinə məruzə etməyə və növbəti addımları liderlərlə koordinasiya etməyə razılaşdığı qeyd olunub. Hərbi nümayəndələrin potensial növbəti görüş üçün məsələlər siyahısını müəyyənləşdirdiyi də vurğulanıb.
Zelenski bildirib ki, tərəflərin irəliləməyə hazır olduğu halda – və Ukrayna bu hazır olduğunu bəyan edir – növbəti görüşlər gələn həftə baş tuta bilər. O, nümayəndə heyətindən geri döndükdən sonra birbaşa məruzə gözlədiyini də qeyd edib.
Paylaşımda Birləşmiş Ərəb Əmirliklərinə və şəxsən ölkə Prezidentinə vasitəçilik və gələcək görüşlərə ev sahibliyi etməyə hazır olduqları üçün təşəkkür ifadə olunub.
Sonda Zelenski vurğulayıb ki, Ukrayna sülh və təhlükəsizlik naminə fəaliyyətini davam etdirir və bu prosesə dəstək verən hər kəsə minnətdarlıq bildirib.
