Rusiya miqrantların vergi öhdəliklərini artırmağa hazırlaşır

Rusiya hökuməti Maliyyə Nazirliyi tərəfindən hazırlanmış, vizasız ölkələrdən gələn əmək miqrantlarının qalması üçün iqtisadi şərtləri sərtləşdirən “Rusiya Federasiyasında xarici vətəndaşların hüquqi statusu haqqında” Qanuna və Vergi Məcəlləsinə təklif edilən dəyişiklikləri müzakirə edib.

Operativ Media “Kommersant” qəzetinə istinadən xəbər verir ki, sənədlər Vladimir Putinin tapşırığı ilə hazırlanıb və 2027-ci ildə qüvvəyə minə bilər.

Dəyişikliklər patent üçün sabit məbləğdə gəlir vergisi ödəməli olan əcnəbilərin dairəsini genişləndirir. Siyahıya Rusiyada müvəqqəti və daimi yaşayan, fiziki şəxslər üçün şəxsi və məişət ehtiyacları məqsədilə işləyən miqrantlar da daxil ediləcək. Patent sahibinin yetkinlik yaşına çatmayan uşaqları və ya digər himayəsində olan şəxsləri varsa, onların hər biri üçün müəyyən edilmiş əlavə ödənişin 50 faizi ödənilməlidir. Uşaqlar 18 yaşına çatdıqdan sonra patent üçün müraciət etməli və ya yaşayış üçün başqa əsasları olmadığı təqdirdə ölkəni tərk etməlidirlər.

Baza aylıq ödəniş 1,2 min rubl təşkil edir və bu məbləğ müvafiq əmsallarla vurulur. Moskvada ödəniş aylıq 10 min rubla, regionlarda isə 3,4 mindən 27,3 min rubla qədər dəyişir.

Qanun layihəsi Daxili İşlər Nazirliyi ilə Federal Vergi Xidməti arasında məlumat mübadiləsinin gücləndirilməsini nəzərdə tutur. Vizanın müddətinin uzadılması üçün miqrant özünü və ailə üzvlərini nəzərə almaqla, regional yaşayış minimumundan aşağı olmayan “təmiz” gəlirini təsdiqləməlidir. Vergi orqanları əcnəbilərin gəlirləri barədə məlumatları hər rüb Daxili İşlər Nazirliyinə təqdim edəcək.